大埔明晚坐鎮旺角大球場，於「亞冠盃2」E組分組賽，煞科戰鬥河內公安。「綠戰士」表明全力以赴，為球迷及社區而戰，以行動體現「Beyond Our Community」的足球精神，在球場內外展現出港人的團結力量。■圖、文：文嘉靖

於2016年首度執教大埔的李志堅，2018至19球季領軍勇奪港超冠軍，相隔4季後於2023年重返大埔，上季再度助「綠戰士」封王，同時今季創下香港球隊在「亞冠盃2」的最佳成績，各項成就背後，「堅Sir」一直視球迷為球隊珍貴的基石：「我認知嘅大埔球迷係好『Die-hard』，就算球隊曾經降班，佢哋都齊上齊落，又一路跟住去作客睇波，球隊人事每季都有變化，唯一唔變嘅係呢班球迷，佢哋永遠都會喺度。」

向來重視與球迷之間關係的「堅Sir」，不時與球迷聚會交流，甚至組織球迷踢波，其中就結識到「忠粉」Sherman：「作為第一代地區球隊，大埔特別有凝聚力，前幾年開始已經會搞唔同活動，當中識咗Sherman，成日搵佢幫手，近排先知原來佢住西環。佢哋出錢又出時間，好有心支持球會，呢種關係真係長期累積。」

「堅Sir」口中的Sherman，自中學起開始關注本地波，2008至2009年港甲時期就「入坑」大埔，他亦擔任球迷組織「12th綠戰士」的管理員之一。Sherman形容「堅Sir」親民程度前所未見：「『堅Sir』好願意同班球迷溝通，對球隊同球迷嚟講絕對係好事，喺香港可以同教練團咁Close，真係一啲都唔易。每次去接球隊機，佢都會主動埋嚟同我哋傾計，佢一直都好關照、好錫我哋班球迷。」

2019年大埔首度征戰「亞協盃」，當時Sherman已經隨軍四處作客，由台灣遠至北韓都有其足跡，對今季「亞冠盃2」感受至深：「雖然我唔係住大埔，但咁多年大家都互相支持，今季『亞冠盃2』小組對手好強，我哋原本期望有分落袋就滿足，即使最後唔能夠晉級，但球隊已經話畀外界知，香港球員係得嘅，期待聽晚可以為今次之旅創造一個圓滿結局。」

大埔日前宣布將今場門票收益，全數撥捐宏福苑受災居民，於大埔居住逾20年的「堅Sir」表示：「今場波係為宏福苑居民籌款，我哋除咗盡力攞分報答球迷嘅支持，亦希望畀到力量佢哋，輪到我哋為大埔打氣，令受影響嘅災民知道『We stand together』。希望大家關心多啲身邊人，互相守望幫助每個家庭去行未來嘅路。」

今季與「堅Sir」第3度合作的費蘭度，亦承諾為大埔社區奮鬥到底，為居民送上安慰：「我一直祈禱盼望神庇佑大埔，今場波對我嚟講有特殊意義，火災過後大家都好難過，我保證球隊上下會傾盡百分之二百嘅努力，為佢哋踢好場波。」