歌手胡鴻鈞日前在佛山完成處男音樂劇《從來是一對》，下了不少苦功的他壓力爆煲，幸獲觀眾高度評價，令他放下心頭大石，他自評演出80分：「頭兩場冇乜大失誤，都算幾滿意。我用咗個多月準備，做完感覺係興奮、緊張又刺激，始終係處男音樂劇，好似好夢幻咁。」

劇中除了要演繹歌舞，他還挑戰唱粵曲：「要唱出粵劇韻味真係好難，始終排練時間咁短，我只係盡量模仿個語氣。」又自爆有「蝦碌」情況：「有場戲要攞阿媽個袋出嚟，但出台突然忘記咗，心諗點算好呢！好彩飾演我阿媽嘅彭杏英經驗豐富，即刻話：『阿仔我個袋喺邊呀？你快啲返去幫我攞啦！』」他明白到執生技巧相當重要，希望之後的深圳、中山演出會更好。